தர்ஷினியின் வண்ணங்கள்

Karpura Bommai - Keladi Kanmani

2010-10-25T00:59:00.000-07:00

THAYAR NAVARATHRI 2010

2010-10-24T22:31:00.000-07:00

நான் விரும்பி படித்தவைகள் - பகுதி - (13) - அகத்தியர் தேவாரத் திரட்டு - (04)

2010-06-09T07:18:00.000-07:00

திருஞான சம்பந்தர் தேவாரம்

294. திரு ஆலவாய்

திருமுறை : 2 ( 66-வது பதிகம் )

பண் : காந்தாரம்

இராகம் : நவரோசு

மந்திரமாவது நீறு வானவ மேலது நீறு

சுந்தரமாவது நீறு துதிக்கப்படுவது நீறு

தந்திரமாவது நீறு சமயத்தில் உள்ளது நீறு

செந்துவர் வாய் உமைபங்கன் திரு ஆலவாயான் திருநீறே. (01)

வேதத்தில் உள்ளது நீறு வெந்துயர் தீர்ப்பது நீறு

போதம் தருவது நீறு புன்மை தவிர்ப்பது நீறு

ஓதத் தகுவது நீறு உண்மையில் உள்ளது நீறு

சீதப் புனல் வயல் சூழ்ந்த திரு ஆலவாயான் திருநீறே. (02)

முத்தி தருவது நீறு முனிவர் அணிவது நீறு

சத்தியம் ஆவது நீறு தக்கோர் புகழ்வது நீறு

பத்தி தருவது நீறு பரவ இனியது நீறு

சித்தி தருவது நீறு திரு ஆலவாயான் திருநீறே. (03)

காண இனியது நீறு கவினைத் தருவது நீறு

பேணி அணிபவர்க்கு எல்லாம் பெருமை கொடுப்பது நீறு

மாணம் தகைவது நீறு மதியைத் தருவது நீறு

சேணம் தருவது நீறு திருஆல்வாயான் திருநீறே. (04)

பூச இனியது நீறு புண்ணியம் ஆவது நீறு

பேச இனியது நீறு பெருந் தவத்தோர்களுக்கு எல்லாம்

ஆசை கெடுப்பது நீறு அந்தம் அது ஆவது நீறு

தேசம் புகழ்வது நீறு திரு ஆலவாயான் திருநீறே. (05)

அருத்தமதாவது நீறு அவலம் அறுப்பது நீறு

வருத்தம் தணிப்பது நீறு வானம் அளிப்பது நீறு

பொருத்தம் அது ஆவது நீறு புண்ணியர் பூசும் வெண்நீறு

திருத் தகு மாளிகை சூழ்ந்த திரு ஆலவாயான் திருநீறே. (06)

எயிலது அட்டது நீறு இருமைக்கும் உள்ளது நீறு

பயிலப்படுவது நீறு பாக்கியம் ஆவது நீறு

துயிலைத் தடுப்பது நீறு சுத்தம் அது ஆவது நீறு

அயிலைப் பொலிதரு சூலத்து ஆலவாயான் திருநீறே. (07)

இராவணன் மேலது நீறு எண்ணத் தகுவது நீறு

பராவணம் ஆவது நீறு பாவம் அறுப்பது நீறு

தராவணம் ஆவது நீறு தத்துவம் ஆவது நீறு

அரா அணங்கும் திருமேனி ஆலவாயான் திருநீறே. (08)

மாலொடு அயன் அறியாத வண்ணமும் உள்ளது நீறு

மேல் உறை தேவர்கள் தங்கள் மெய்யது வெண்பொடி நீறு

ஏல உடம்பு இடர் தீர்க்கும் இன்பம் தருவது நீறு

ஆலம் அது உண்டமிடற்று எம் ஆலவாயான் திருநீறே. (09)

குண்டிகைக் கையர்களொடு சாக்கியர் கூட்டமும் கூடக்

கண் திகைப்பிப்பது நீறு கருத இனியது நீறு

எண் திசைப் பட்ட பொருளார் ஏத்தும் தகையது நீறு

அண்டத்தவர் பணிந்து ஏத்தும் ஆலவாயான் திருநீறே. (10)

ஆற்றல் அடல்விடை ஏறும் ஆலவாயான் திருநீற்றைப்

போற்றிப் புகலி நிலாவும் பூசுரன் ஞானசம்பந்தன்

தேற்றித் தென்னன் உடல் உற்ற தீப்பிணியாயின தீரச்

சாற்றிய பாடல்கள் பத்தும் வல்லவர் நல்லவர் தாமே. (11)

திருச்சிற்றம்பலம்

நான் விரும்பி படித்தவைகள் - பகுதி - (12) அகத்தியர் தேவாரத் திரட்டு - [ 04 ]

2010-06-05T07:49:00.000-07:00

78. திருவெண்ணெய்நல்லூர்

திருமுறை : 7 / பதிகம் 78

பண் : இந்தளம்

இறைவன் : தடுத்தாட் கொண்ட நாதர்

இறைவி: வேற்கண்மங்கை

(01) பித்தாபிறை சூடிபெரு மானேயரு ளாளா

எத்தான்மற வாதேநினைக் கின்றேன்மனத்

துன்னை

வைத்தாய்பெண்ணைத் தென்பால் வெண்ணெய்

நல்லூரருள் துறையுள்

அத்தாஉனக் காளாயினி அல்லேனென லாமே.

(02) நாயேன்பல நாளும்நினைப் பின்றிமனத் துன்னைப்
பேயாய்த்திரிந் தெய்த்தேன்பெறல் ஆகாவருள்
   பெற்றேன்
வேயார்பெண்ணைத் தென்பால்வெண்ணெய்
   நல்லுரருள் துறையுள்
ஆயாஉனக் காளாயினி அல்லேனென லாமே.

(03) மன்னேமற வாதேநினைக் கின்றேன்மனத் துன்னைப்
பொன்னேமணி தானேவயி ரம்மேபொரு துந்தி
மின்னார்பெண்ணைத் தென்பால்வெண்ணெய்
   நல்லூரருள் துறையுள்
அன்னேஉனக் காளாயினி அல்லேனென லாமே.

(04) முடியேன்இனிப் பிறவேன்பெறின் மூவேன்பெற்றம்
   ஊர்தீ
கொடியேன்பல பொய்யேஉரைப் பேனைக்குறிக்
   கொள்நீ
செடியார் பெண்ணைத் தென்பால்வெண்ணெய்
   நல்லூரருள் துறையுள்
அடிகேள்உனக் காளாயினி அல்லேனென லாமே.

(05) பாதம்பணி வார்கள்பெறு பண்டம்மது பணியாய்
ஆதன்பொரு ளானேன்அறி வில்லேனரு ளாளா
தாதார்பெண்ணைத் தென்பல்வெண்ணெய்
   நல்லருள் துறையுள்
ஆதீஉனக் காளாயினி அல்லேனெ லாமே.

(06) தண்ணார்மதி சூடீதழல் போலுந்திரு மேனி
எண்ணார்புர மூன்றுமெரி உண்ணநகை செய்தாய்
மண்ணார்பெண்ணைத் தென்பால்வெண்ணெய்
   நல்லூரருள் துறையுள்
அண்ணாஉனக் காளாயினி அல்லேனெ லாமே.

(07) ஊனாய்உயி ராய்உட லானாய்உல கானாய்
வானாய்நிலன் ஆனாய்கடல் ஆனாய்மலை யானாய்
தேனார்பெண்னைத் தென்பால்வெண்ணெய்
   நல்லூரருள் துறையுள்
ஆனாயுனக் காளாயினி அல்லேனென லாமே.

(08) ஏற்றார்புர மூன்றுமெரி உண்ணச்சிலை தொட்டால்
தேற்றாதன சொல்லித்திரி வேனோசெக்கர் வானீர்
ஏற்றாய்பெண்ணைத் தென்பால்வெண்ணெய்
   நல்லூரருள் துறையுள்
ஆற்றாய்உனக் காளாயினி அல்லேனெ லாமே.

(09) மழுவாள்வல னேந்தீமறை ஓதீமங்கை பங்கா
தொழுவாரவர் துராயின தீர்தல்உன தொழிலே
செழுவார்பெண்ணைத் தென்பால்வெண்ணெய்
   நல்லூரருள் துறையுள்
அழகாஉனக் காளாயினி அல்லேனெ லாமே.

(10) காரூர்புனல் எய்திக்கரை கல்வித்திரைக் கையால்
பாரூர்புகழ் எய்தித்திகழ் பன்மாமணி உந்திச்
சீரூர்பெண்ணைத் தென்பால்வெண்ணெய்
   நல்லூரருள் துறையுள்
ஆரூரனெம் பெருமாற்கா ளல்லேனென லாமே.

திருச்சிற்றம்பலம்

நான் விரும்பி படித்தவைகள் - பகுதி - (11) அகத்தியர் தேவாரத் திரட்டு - [ 03 ]

2010-05-16T16:22:00.000-07:00

257 திருவதிகை வீரட்டானம்

திருமுறை : 4 / 1-வது பதிகம்

பண் : கொல்லி

இறைவர் : வீரட்டேசுவரர்

இறைவி : திரிபுர சுந்தரி

திருச்சிற்றம்பலம்

கூற்று ஆயினவாறு விலக்ககிலீர்

கொடுமை பல செய்தன நான் அறியேன்

ஏற்றாய் அடிக்கே இரவும் பகலும்

பிரியாது வணங்குவன் எப்பொழுதும்

தோற்றாது என் வயிற்றின் அகம்படியே

குடரொடு துடக்கி முடக்கியிட

ஆற்றேன் அடியேன் அதிகைக் கெடில

வீரட்டானத்து உறை அம்மானே. (01)

நெஞ்சம் உமக்கே இடமாக வைத்தேன்

நினையாது ஒருபோதும் இருந்தும் அறியேன்

வஞ்சமிது ஒப்பது கண்டு அறியேன்

வயிற்றொடு துடக்கி முடக்கியிட

நஞ்சும் ஆகி வந்தென்னை நலிவதனை

நணுகாமல் துரந்து கரந்துமிடீர்

அஞ்சேலும் என்னீர் அதிகைக் கெடில

வீரட்டானத்து உறை அம்மானே. (02)

பணித்தாரன பாவங்கள் பாற்ற வல்லீர்

படுவெண்தலையில் பலி கொண்டு உழல்வீர்

துணிந்தே உமக்கு ஆட்செய்து வாழல் உற்றால்

சுடுகின்றது சூலைத் தவிர்த்து அருளீர்

பிணித்தார் பொடி கொண்டு மெய் பூச வல்லீர்

பெற்றம் ஏற்று உகந்தீர் சுற்றும் வெண்தலை கொண்டு

அணிந்தீர் அடிகேள் அதிகைக் கெடில

வீரட்டானத்து உறை அம்மானே. (03)

முன்னம் அடியேன் அறியாமையினான்

முனிந்து என்னை நலிந்து முடக்கியிடப்

பின்னை அடியேன் உமக்கு ஆளும் பட்டேன்

சுடுகின்றது சூலை தவிர்த்து அருளீர்

தன்னை அடைந்தார் வினை தீர்ப்பது அன்றோ

தலையாவர் தம்கடன் ஆவது தான்

அன்னம் நடையார் அதிகைக் கெடில

வீரட்டானத்து உறை அம்மானே. (04)

காத்து ஆள்பவர் காவல் இகழ்ந்தமையால்

கரை நின்றவர் கண்டுகொள் என்று சொல்லி

நீத்து ஆய கயம் புக நூக்கியிட

நிலை கொள்ளும் வழித்துறை ஒன்று அறியேன்

வார்த்தை இது ஒப்பது கேட்டு அறியேன்

வயிற்றொடு துடக்கி முடக்கியிட

ஆர்த்தார் புனல் ஆர் அதிகைக் கெடில

வீரட்டானத்து உறை அம்மானே. (05)

சலம் பூவொடு தூபம் மறந்து அறியேன்

தமிழொடு இசை பாடல் மறந்து அறியேன்

நலம்தீங்கிலும் என்நாவில் மறந்து அறியேன்

உன்நாமம் என் நாவில் மறந்து அறியேன்

உலந்தார் தலையில் பலிகொண்டு உழல்வாய்

உடலுள் உறுசூலை தவிர்த்து அருளாய்

அலந்தேன் அடியேன் அதிகைக் கெடில

வீரட்டானது உறை அம்மானே. (06)

உயர்ந்தேன் மனைவாழ்க்கையும் ஒண்பொருளும்

ஒருவர் தலை காவல் இலாமையினால்

வயந்தே உமக்கு ஆட்செய்து வாழல் உற்றால்

வலிக்கின்றது சூலை தவிர்த்து அருளீர்

பயந்தே என்வயிற்றின் அகம்படியே

பறித்து புரட்டி அறுத்து ஈர்த்திட நான்

அயர்ந்தேன் அடியேன் அதிகைக் கெடில

வீரட்டானத்து உறை அம்மானே. (07)

வலிந்தேன் மனைவாழ்க்கை மகைழ்ந்து அடியேன்

வஞ்சம் மனம் ஒன்றும் இலாமையினால்

சலித்தால் ஒருவர் துணை யாரும் இல்லைச்

சங்கவெண் குழைக் காதுஉடை எம்பெருமான்

கலித்தே என் வயிற்றின் அக்ம்படியே

கலக்கி ம்லக்கிட்டுக் கவர்ந்து தின்ன

அலுத்தேன் அடியேன் அதிகைக் கெடில

வீரட்டானத்து உறை அம்மானே. (08)

பொன்போல மிளிர்வது ஓர் மேனியினீர்

புரிபுன் சடையீர் மெலியும் பிறையீர்

துன்பே கவலை பிணி என்று இவற்றை

நணுகாமல் துரந்து கரந்தும் இடீர்

என்போலிகள் உம்மை இனித் தெளியார்

அடியார் படுவது இதுவே ஆகில்

அன்பே அமையும் அதிகைக் கெடில

வீரட்டானத்து உறை அம்மானே. (09)

போர்த்தாய் அங்குஓர் ஆனையின் ஈருரிதோல்

புறங்காடு அரங்கா நடம்ஆட வல்லாய்

ஆர்த்தான் அரங்கன்தனை மால்வரைக் கீழ்

அடர்த்திட்டு அருள் செய்த அது கருதாய்

வேர்த்தும் புரண்டும் விழுந்தும் எழுந்தால்

என்வேதனை ஆன விலக்கிடாய்

ஆர்த்தார் புனல் சூழ் அதிகைக் கெடில

வீரட்டானத்து உறை அம்மானே. (10)

ந்தலை கொண்டு

நான் விரும்பி படித்தவைகள் - பகுதி - (10) - அகத்தியர் தேவாரத் திரட்டு - (02)

2010-05-02T06:08:00.000-07:00

திருச்சிற்றம்பலம்

திருஞான சம்பந்தமூர்த்தி நாயனார்

திருப்பிரமபுரம்

பண் : நட்டபாடை

(01) தோடு உடைய செவியன் விடை ஏறியோர் தூவெண்மதிசூடி

காடு உடைய சுட லைப் பொடிபூசி என்னுள்ளம் கவர் கள்வன்

ஏடு உடைய மலரால் முனைநாள் பணிந்து ஏத்த அருள்செய்த

பீடு உடையபிர மாபுரமேவிய பெம்மானி வனன்றே. ம்

(02) முற்றல் ஆமை இள நாகமொடு ஏனமுளைக்கொம்பு
அவைபூண்டு

வற்றல்ஓடு கலனாப் பலிதேர்ந்து எனது உள்ளம் கவர்
கள்வன்
கற்றல் கேட்டல் உடையார் பெரியார் கழல் கையால்
தொழுது ஏத்த
பெற்றம் ஊர்ந்த பிரமாபுரம் மேவிய பெம்மான்
இவன் அன்றே.

(03) நீர் பரந்த நிமிர் புன்சடைமேல் ஓர் நிலா வெண்மதி சூடி
ஏர் பரந்த இனவெள்வளை சோர என் உள்ளம் கவர் கள்வன்
ஊர் பரந்த உலகின் முதல் ஆகிய ஓர் ஊர் இது என்னப்
பேர்பரந்த பிரமாபுரம் மேவிய பெம்மான் இவன் அன்றே.

(04) விண் மகிழ்ந்த மதில் எய்த்ததும் அன்றி விளங்கு தலை ஓட்டில்
உள் மகிழ்ந்து பலி தேரிய வந்து எனது உள்ளம் கவர் கள்வன்
மண் மகிழ்ந்த அரவம் மலர்க்கொன்றை மலிந்த வரை மார்பில்
பெண் மகிழ்ந்த பிரமாபுரம் மேவிய பெம்மான் இவன் அன்றே.

(05) ஒருமை பெண்மை உடையன் சடையன் விடை ஊரும்
இவன் என்ன
அருமை ஆக உரைசெய்ய அமர்ந்து எனது உள்ளம் கவர்
கள்வன்
கருமை பெற்ற கடல் கொள்ள மிதந்தது ஓர் காலம் இது
என்னப்
பெருமை பெற்ற பிரமாபுரம் மேவிய பெம்மான் இவன்
அன்றே.

(06) மறை கலந்த ஒலி பாட ஆடலர் ஆகி மழு ஏந்தி
இறை கலந்த இனவெள்வளை சோர என் உள்ளம் கவர் கள்வன்
கறை கலந்த கடி ஆர் பொழில் நீடு உயர் சோலை கதிர்சிந்தப்
பிறை கலந்த பிரமாபுரம்மேவிய பெம்மான் இவன் அன்றே.

(07) சடை முயங்கு புனலன் அனலன் எரிவீசிச் சதிவு எய்த
உடை முயங்கும் அரவொடு உழிதந்து எனது உள்ளங்
கவர் கள்வன்
கடல் முயங்கு கழிசூழ் குளிர்கானல் அம் பொன் அம்
சிறகு அன்னம்
பெடை முயங்கு பிரமாபுரம் மேவிய பெம்மான் இவன்
அன்றே.

(08) வியர் இலங்கு வரை உந்திய தோள்களை வீரம்
விளைவித்த
உயர் இலங்கை அரையன் வலி செற்று எனது உள்ளம்
கவர் கள்வன்
துயர் இலங்கும் உலகில் பல ஊழிகள் தோன்றும்
பொழுது எல்லாம்
பெயர் இலங்கு பிரமாபுரம் மேவிய பெம்மான் இவன்
அன்றே.

(09) தாள் நுதல் செய்து இறை காணிய மாலொடு தண்
தாமரையானும்
நீணுதல் செய்து ஒழிய நிமிர்ந்தான் எனது உண்ணங்
கவர் கள்வன்
வாள்நுதல் செய் மளீர் முதலாகிய வையத்தவர் ஏத்த
பேணுதல்செய் பிரமாபுரம் மேவிய பெம்மான்
இவன் அன்றே.

(10) புத்தரொடு பொறி இல் சமணும் புறம் கூற நெறி நில்லா
ஒத்த சொல்ல உலகம் பலி தேர்ந்து எனது உள்ளம்
கவர் கள்வன்
மத்த யானை மறுக உரி போர்த்தது ஓர்மாயம் இது
என்ன
பித்தர் போலும் பிரமாபுரம் மேவிய பெம்மான் இவன்
அன்றெ.

(11) அருநெறிய மறை வல்ல முனி அகன் பொய்கை அலர் மேய
பெரு நெறிய பிரமபுரம் மேவிய பெம்மான் இவன் தன்னை
ஒருநெறிய மனம் வைத்து உணர் ஞான சம்பந்தன் உரை செய்த
திரு நெறிய தமிழ் வல்லவர் தொல்வினை தீர்தல் எளிதாமே.

திருச்சிற்றம்பலம்

நான் விரும்பி படித்தவைகள் - பகுதி - (09)- அகத்தியர் தேவாரத் திரட்டு - [01]

2010-04-29T09:17:00.000-07:00

திருசிற்றம்பலம்

திருஞானசம்பந்தர், திருநாவுக்கரசர், சுந்தரர் என்னும் சைவ சமயக் குரவர் மூவரும் தீ வடிவமான சிவப் பரம்பொருளே முழு முதல் கடவுள் என்று உயிர்கள் அறிந்து வழிபட்டு உய்யுமாறு பாடிய பாடல்கள் தேவாரம் எனப்பட்டது.இவை ஏழு திருமுறைகளாக வகுக்கப்பட்டுள்ளன.இவ்வேழு திருமுறைகளே அடங்கன் முறை என்று சொல்லப்படும்.

சிவாலய முனிவர் என்பவர் இவ்வடங்கன் முறையின் பெருமையையும், இதனை முறையோடு நாள்தோறும் ஓதுபவர் வீடு பேறு அடைவர் என்பதியும் அறிந்து நாள்தோறும் அவ்வாறே ஓத விரும்பினார். எனினும், அது முற்றுப் பெறாமையினாலேயே அவர் தில்லையை அடைந்து பொற்சபையில் சிவபெருமானை வணங்கித், தம் கருத்து முழுமைய அடைய பலகாலம் தவம் செய்தார். அச்சமயம், ‘சிவாலய முனிவரே! நீர் பொதிய மலையிலே உறையும் அகத்திய முனிவரை அடையின் உம் கருத்து முற்றுப் பெறும்’ என்றொரு வான் மொழி எழுந்தது. அதன்படியே அவர் பொதிய மலையினை அடைந்து மூன்றாண்டுகள் தவம் செய்தார்.அகத்தியர் அத்தவத்திற்கு இரங்கி வெளிப்பட்டு, அடங்கன் முழுமையையும் அவருக்கு எடுத்து இயம்பி பொருள் அருளினார். அவ்வடங்கன் முறையினின்று இருபத்தைந்து திருப்பதிகங்களைத் திரட்டி, ‘இவைகளை முறையே ஓதின் அடங்கன் முறை முழுமையையும் ஓதியதன் பலன் கிடைக்கும்’ என்றுகூறி மறைந்தருளினார். சிவாலய முனிவர் அவ்வாறே அவ் இருபத்தைந்து பதிகங்களையும் நாடோறும் நெடுங்காலம் ஓதிக் கொண்டிருந்து வீடு பேற்றை அடைந்தனர்.

அகத்திய மாமுனிவர் திரட்டியருளிய

தேவாரத் திரட்டு

தேவார நுதலிய பொருள்

நேரிசை வெண்பா

குருவுருவும் வெண்ணீ றெழுத்தஞ்சுங் கோயில்

அரனுருவும் எந்தலைமேல் ஆக்கும் - திருவடியும்

சிட்டான அர்ச்சனையுந் தொண்டுஞ் சிவாலயர்க்கென்று

இட்டார் அகத்தியனார் எட்டு.

முழுமுதற் பரம் பொருளாகிய இறைவன் ஞான ஆசிரியரத் திருமேனி தங்கிவந்து, மக்களுக்குச் செய்யும் அருள் திறமும், திரு வெண்ணீறும், திரு ஐந்தெழுத்தும், திருக்கோயிலும், சிவபெருமானின் திருவுருவும், என் தலைமேல் அணியாகச் சூட்டுகின்ற திருவடியும், மேன்மை தங்கிய சிவார்ச்சனையும், அடிமைத்திறமும் ஆகிய இவ்வெட்டினையும் தெளிய உணர்த்தும் திருப் பதிகங்களை அகத்திய முனிவர் தம்மை வழிபட்டு வேண்டிய சிவாலய முனிவர்க்காக தொகுத்து கொடுத்து அருளினார்.

திருப்பதிகக் கட்டுரை

நிலைமண்டில ஆசிரியப்பா

தோடு கூற்றுப் பித்தா மூன்றும்

பீடுடை தேசிகன் பேரருளாகும்

நீற்றுப் பதிகம் நிகழ்த்துங் காலை

மாற்றுப் பரையின் வரலா றாகும்

துஞ்சல் காதல் சொற்றுணை மற்றும் (05)

அஞ்செழுத் துண்மை யருளிய தாகும்

ஆரூர் தில்லை காட்டூர் மூன்றும்

சீரார் கோயில் திறமைய தாகும்

ஓருரு வரிய பாளை வடிவே

மருவா ரென்ற வண்டமி ழைந்தும் (10)

திருவார் மேனிச் செய்திய தாகும்

பொடியுடை யரவணை யந்த ணாளன்

அடியிணை தந்த அருளே யாகும்

பந்து வேற்றா கொன்றிவை மூன்றும்

நந்தலில் அருச்சனை நாட்டிய தாகும் (15)

வேய்குலந் தில்லை யெனுமிவை மூன்றும்

நாயனும் அடிமையும் நாடிய தாகும்

இப்பரி சகத்திய முனிவன் இருநிலத்

தொப்பரு மூவர் ஓதுதே வாரம்

முழுதையுஞ் சிவாலய முனிக்கறி வித்துப் (20)

பழுதிலா அவையுட் பரிந்தெடுத் திருபத்

தைந்துயர் பதிகமும் அறிவுறத் திரட்டி

என்னரும் அடங்கல் யாவையும் உனரும்

புண்ணியம் இவைகொடு பொருந்தும் என்றவன்

தனக்கருள் செய்தனன் தகவுற அதனால் (25)

தீதிலா அகத்தியத் திரட்டினை உலகில்

ஓதினர் அடங்கலும் ஓதின ராவரே.

‘தோடு’, ‘கூற்று’, ‘பித்தா’ என்னும் சொற்களுள் ஒவ்வொன்றையும் முறையே முதலாவதாக உடைய மூன்று திருப் பதிகங்களும், ஒப்பற்ற பெருமையுடைய

ஞான தேசிகனது பெரிய திருவருவடித் திறத்தை விளக்கும் தன்மையன ஆகும். ‘மந்திரம்’ என்னும் சொல்லை முதலாக உடைய திருவெண்ணீற்றுப் பதிகம் ஒன்றும், எடுத்துக் கூறும் பொழுது பிறவிக்கு ஏதுவாய மலத்தை நீக்குதற்குரிய சக்தியின் சொரூபத்த விளக்கும் தன்மையதாகும். ‘துஞ்சல்’, ‘காதல்’, ‘சொற்றுணை’, ‘மற்று’ என்பனவற்றைமுறையே முதலாக உடைய நான்குத் திருப்பதிகங்களும் திரு ஐந்தெழுத்தின் உண்மை அருளியது ஆகும். ’ஆரூர்’, ‘தில்லை’, ‘காட்டூர்’ என்பனவற்றை முதலாக உடைய மூன்று திருப்பதிகங்களும், சிறப்பினை உடைய திருக் கோயில் திறத்தை விளக்குவன ஆகும். ‘ஓருரு’, ‘வரிய’, ‘பாளை’, ‘வடிவேறு’, ‘மருவார்’ என்று சொல்லப்பட்டவைகளை முறையே முதலாக உடைய வளப்பம் பொருந்திய தமிழ்ப் பதிகங்கள் ஐந்தும் கண்டோரைத் தன் வயமாக்கும் திரு உருவைச் சொல்லும் தன்மையவாகும். ‘பொடியுடை’, ‘அரவணை’, ‘அந்தணாளன்’ என்னும் தொடர்களை முறையெ முதலாக உடைய திருப் பதிகங்கள் மூன்றும் சிவபெருமானது திருவடிகள் இரண்டும் நல்கும் அருள் திறத்தை விளக்குவன ஆகும். ‘பந்து’, ‘வேற்றா’, ‘கொன்று’ என்னும் இவற்றை முதலாக உடைய இம் மூன்று திருப்பதிகங்களும், கெடுதல் இல்லாத சிவா அர்ச்சனையின் திறத்தை நிலை பெறுத்திய தன்மைய ஆகும். ‘வேய்’, ‘குலம்’, ‘தில்லை’ என்னும் சொற்களை முறையே முதலாக உடைய இம் மூன்றுத் திருப் பதிகங்களும், ஆண்டான் அடிமைத் திறத்தை நிலை நாட்டிய தன்மையதாகும்.மேலெ கூறப்பட்ட இம்முறையில் அகத்திய முனிவர் இப்பெரிய நில உலகில் தம்மைத் தாமே ஒப்பான தன்மை உடைய சமக் குரவர் மூவர் திருவாய் மலர்ந்தருளிய தேவாரத் திருப் பதிகங்கள் முழுவதையம் சிவாலய முனிவருக்கு அறியுமாறு கூறி, குற்றமற்ற அப்பதிகங்களுள் மேலான இத் திருபதிகங்கள் இருபத்து ஐந்தையும் விருப்பி எடுத்து, ஓதுவோர்க்கு உண்மை அறிவு பொருந்தும்படி திரட்டி அருளி, அளவற்ற, அடங்கன்முறைத் திருப்பதிகங்கள் எல்லாவற்றையும் ஓதி உணரும் புண்ணியம் இவ்விருபத்தைந்து திருப்பதிகங்களையும் ஓதி உணர்ந்தால் கூடும் என்று அச்சிவாலய முனிவருக்கு அருளிச் செய்தார். அக்கரணத்தால் குற்றமற்ற ‘அகத்தியத் திரட்டு’ என்னும் இத் திருமுறையை இவ்வுலகிலோதும் முறை பொருந்தும்படி ஓதுகின்றவர்கள் அடங்கன் முறைத் திருப்பதிகங்கள் எல்லாவற்றையும் ஓதினவர் ஆவார்கள்.

அகத்தியர் தேவாரத் திரட்டு

திருஞான சம்பந்தமூர்த்தி நாயனார் பதிகங்கள்

01 திருப்பிரமபுரம் - [தோடுடையசெவி] - திருமுறை 1/1

02 திருவாலவாய்த் திருநீற்றுப் பதிகம் [மந்திரம்] - திருமுறை 2/66

03 பஞ்சாக்கரத் திருப்பதிகம் - [துஞ்சலும்] - சீர்காழி- திருமுறை 3/22

04 நமச்சிவாயத் திருப்பதிகம் - [காதலாகி]- திருநல்லூர்ப்பெருமணம்

- திருமுறை 3/49

05 திருப்பதிக்கோவை - [ஆரூர்தில்லை] - சீர்காழி- திருமுறை 2/39

06 திருவெழு கூற்றிருக்கை - [ஓரூரு] - திருப்பிரமபுரம் - திருமுறை 1/128

07 திருக்கடவூர் மயானம் -[வரிய] - திருமுறை- 2/80

08 திருவாழ்கொளிபுத்தூர் - [பொடியுடை] -திருமுறை 1/40

09 திருப்பூந்தராய் - [ப்ந்துசேர்விரலாள்] -திருமுறை- 3/2

10 கோளறு திருப்பதிகம் - [வேயுறு] - திருமறைக்காடு -திருமுறை 2/85

திருநாவுக்கரச் நாயனார் பதிகங்கள்

01. திருவதிகை வீரட்டானம் - [கூற்றா] - திருமுறை - 4/1

02. நமச்ச்சிவாயத் திருப்பதிகம் - [சொற்றுணை] - திருமுறை - 4/11

03. திருப்பதிக் கோவை - [தில்லை] - திருப்புகலூர்-திருமுறை 6/70

04. கோயில் திருவிருத்தம் - [பாளை] - திருத்தில்லை - திருமுறை 4/80

05. திருப்பூவணம்- [ வடியேறு] - திருமுறை 6/18

06. திருவதிகை வீரட்டானம்- [அரவணையான்] - திருமுறை - 6/6

07. திருக்கயிலாயம் - [வேற்றாகி] - திருவையாறு - திருமுறை - 6/55

08. திருவாரூர்த் திருவிருத்தம் - [குலம்பல] - திருவாரூர் - திருமுறை 4/101

சுந்தரமூர்த்தி நாயனார் பதிகங்கள்

01. திருவெண்ணெய்நல்லூர் - [பித்தா] -திருமுறை -7/

02. திருப்பாண்டிக்கொடுமுடி- [மற்றுப்பற்றெனக்] -திருமுறை 7/

03. ஊர்த்தொகை - [காட்டூர்க்] - கோயிற்றிறம் -திருமுறை 7/

04. திருக்கடவூர்மயானம் -[மருவார்] - திருமுறை 7/

05. திருப்புன்கூர் - [அந்தணாளன்] - திருமுறை - 7/

06. திருக்கழுக்குன்றம் - [ கொன்று செய்த] -திருமுறை - 7/

07. திருத்தொண்டர்த்தொகை - [ தில்லைவாழ்] - திருமுறை 7/

நான் விரும்பி படித்தவைகள் - பகுதி - (08)

2010-04-23T09:02:00.000-07:00

குலசேகர ஆழ்வார் - பெருமாள் திருமொழி - நான்காம் திருமொழி

ஊனேறு செல்வம்

677. உனேறு செல்வத்து உடல் பிறவி யான் வேண்டேன்

ஆனேறேழ் வென்றான் அடிமைத் திறமல்லால்

கூனேறு சங்கம் இடந்தாந்தன் வேங்கடத்து

கோனேரி வாழும் குருகாய்ப் பிறப்பனே. (01)

நப்பினைப் பிராட்டியின் பொருட்டு ஏழு எருதுகளை வென்றவனான எம் பெருமானுக்கு அடித்தொண்டு செய்வதையே நான் வேண்டுகிறேன். இம்மானுட உடம்பெடுத்துப் பிறத்தலை நான் விரும்ப மாட்டேன். அன்றியும்

பாஞ்ச சன்னியம் என்னும் சங்கினை இடது கையிலே உடையவனான எம் பெருமானின் திருவேங்கட மலையில் திருக்க் கோனேரிஎன்றழைக்கப் படும் குளத்தில் வாழும் நாரையாகவாவது பிறக்கக் கடவேனாக.

678. ஆனாத செல்வத்து அரம்பையர்கள் தற்சூழ்

வானாளும் செல்வமும் மண்ணரசும் யான்

வேண்டேன்

தேனார் பூஞ்சோலைத் திருவேங்கடச் சுனையில்

மீனாய் பிறக்கும் விதியுடையே நாவேனே. (02)

அழியாத செல்வத்தையுடைய அரம்பையர்கள் என்னைச் சூழ்ந்து நிற்க மேலுகை அரசாள்கின்ற செல்வத்தையும், இம்மண்ணுலகை ஆளுகின்ற செல்வத்தையும் அரிய முயற்சியின்றிக் கிடைப்பதாயினும் நான் விரும்ப மாட்டேன்.தேன் மிக்க மலர்கள் நிறைந்துள்ல சோலைகளுடைய திருவேங்கட மலையில் இருக்கின்ற சுனைகளிலே ஒரு மீனாகப் பிறக்கத் தக்க பேற்றினை நான் பெறக் கடவேனாக.

679 பின்னிட்ட சடையானும் பிரமனும் இந்திரனும்

துன்னிட்டுப் புகலரிய வைகுந்த நீள்வாசல்

மின்வட்டச் சுடராழி வேங்கடக் கோன் தானுமிழும்

பொன் வட்டில் பிடித்துடனே புகப் பெறுவனாவனே. (03)

திரித்து விட்ட சடையுடையவனான சிவனும், நான்முகனும், தேவேந்திரனும், நெருங்கி முயன்றும் ள்லே புகுவதற்கு எளியதாய் இராத பூலோக வைகுண்ட மா கிய திருமலையிலுள்ள திருக்கோயிலின் நீண்ட திருவாயிலிலே, மின்னலை வளைத்தற் போன்றச் ஒளி வடிவமாய் விளங்குகின்ற சக்கர ஆயுதத்தை உடைய திரு வேங்கட முடையான் வாய் உமிழ்கின்ற தங்க வட்டிலைக் கையிலேந்த்க் கொண்டு அந்தரங்க அடிமைக் கொண்டவருடனே

யானும் உள்ளே புகும் பேற்றினைப் பெறக் கடவேனாக.

680. ஒண்பவள வேலையுலவு தன் பாற்கடலுள்

கண்துயினும் மாயோன் கழலிணைகள் காண்பதற்கு

பண்பகரும் வண்டினங்கள் பண்பாடும் வேங்கடத்து

சென்பகமாய் நிற்கும் திருவுடையேனாவேனே. (04)

உமிழும் பவழக் கொடிகளைக் கரையிலே கொணர்ந்து கொழித்து அலைகள் உலாவுகின்ற குளிர்ச்சியான திருபாற்கடலில் அறிதுயில் செய்யும் மாயோனின் இரு திருவடிகளையும் கண்டு வணங்குவதற்கு இசை பாடும் வண்டினங்களின் கூட்டம் பண்ணிசை முழங்கும் திருமலையிலே சண்பக மரமாய் நிற்கும் பேறுடையவனாகக் கடவேனாக.

681 கம்பமத யானை கழுத்தகத்தின் மேலிருந்து

இன்பமரும் செல்வமும் இவ்வரசும் யான் வேண்டேன்

எம்பெருமான் ஈசன் எழில் வேங்கடமலை மேல்

தம்பகமய் நிற்கும் தவமுடையே னாவேனே. (05)

தன்னைக் கண்டவர்கள் அஞ்சி நடுங்கும் நடுக்கத்தை விளைவிக்கும் மதம் கொண்ட யானையின் கழுத்தின் மீது வீற்றிருந்து எல்லாவித சுகங்களையும் அனுபவிக்கின்ற செல்வத்தையும், அதற்குக் காரணமான அரசாட்சியையும் நான் விரும்ப மாட்டேன். என் தலைவனும், எல்லா உலகங்களுக்கும் தலைவனுமான திருவேங்கடமுடையானுடைய அழகிய திருமலையில் புதராய் நிற்கும்படியான பேற்றினை உடையவனாகக் கடவேன்.

682 மின்னனைய நுண்ணிடையார் உருப்பசியும்

மேனகையும்

அன்னவர்தம் பாடலொடும் ஆடலவை

யாதரியேன்

தென்னவென வண்டிணங்கள் பண்பாடும்

வேங்கடத்துள்

அன்னனையை பொற்குவடாம் அருந்தவத்த

னாவேனே. (06)

மின்னல் போன்ற நுண்ணிய இடையை உடையவர்களாகிய ஊர்வ்சியும், மேனகையும் போலாழகியவர்களான மகளிரின் பாட்டும் கூத்துமான அவற்றை யான் விரும்பவில்லை. வண்டுகளின் கூட்டம் இசைபாடப்பெற்ற திருவேங்கட மலையிலே பொன்மயமான சிகரமாவத்ற்குரிய அருமையான தவத்தை உடையவனாவேனாக.

683 வானாளும் மாமதிபோல் வெண்குடைக் கீழ்

மன்னவர்தம்

               கோனாகி வீற்றிருந்து கொண்டாடும்
                                                                                     செல்வறியேன்
               தேனார் பூஞ்சோலைத் திருவேங்கடமலை மேல்
   கானாறாய்ப் பாயும் கருத்துடையே னாவேனே. (07)

ஆகாயத்தைத் தனக்கு இடமாகக் கொண்டு விளங்குகின்ற பூரண சந்திரன் போன்ற ஒற்றை வெண் கொற்றக் குடைக்கீழ் மன்னர்க்கு எல்லாம் மன்னனாக

பெருமை தோன்ற வீற்றிருந்து அனைவராலும் கொண்டாடப் படுவதற்குக் காரணமான செல்வத்தைப் பெற்றாலும் அதனை யான் ஒரு பொருட்டாக மதிக்க மாட்டேன். தேன் நிறை மலர்கள் மிக்குள்ள சோலைகள் உடைய திருவேங்கடமலையி மே ஒரு காட்டாறாய்ப் பெருகு கருத்தினை உடையவனாக இருக்கிறேன்.

684. பிறையேறு சடையானும் பிரமனும் இந்திரனும்
முறையாய பெருவேள்விக் குறைமுடைப்பான்
மறையானான்
வெறியார் தன்சோலைத் திருவேங்கட மலைமேல்
நெறியாய்க் கிடக்கும் நிலையுடையே னாவேனே. (08)

பிறைமதி சூடிய பெம்மானாகிய சிவனும், பிரமனும், இந்திரனும் தத்தமது தகுதிக்குத் தக்கபடி செய்கின்ற பெரிய யாகங்களின் பலனாக அவர்களது குறையைத் தீர்த்து, அவர்களது வேண்டுகோளை நிறைவேற்றி வைப்பவனும் வேதங்களின் பரம்பொருளான எம்பெருமான் இருப்பிடமான நறு மணம் வீசுகின்ற குளிர் சோலைகளை உடைய திருவேங்கிட மலைமேல் போகிற வழியாய் கிடைக்கின்ற நிலையை உடையவனாகக் கடவேன்.

685. செடியாய வல்வினைகள் தீர்க்கும் திருமாலே

நெடியானே! வேங்கடவா! நின்கோயில் வாசல்

அடியாரும் வானவரும் அரம்பையரும் கடத்தியங்கும்

படியாய்க் கிடந்து உன் பவளவாய் காண்பனே. (09)

செடி போல் அடர்ந்துள்ள கொடிய வினைகளைப் போக்கி அருளுகின்ற பெருமானே! பெரியோனே! திருவேங்கடமுடையானே! உனது சந்நிதியின் உள் வாசலிலே பாகவதர்களும் மற்றையத் தேவர்களும் அரம்பை மாதரும் இடைவிடாது, இயங்குபடியான படியாய்ப் பொருந்தி உனது பவளம் போன்ற உன்வாயைக் காண்பேனாகக் கடவேன்!

686. உம்பர் உலகாண்டு ஒரு குடைக்கீழ் உருப்பசிதன்

அம்பொற் கலையல்குல் பெற்றாலும் ஆதரியேன்

செம்பவள வாயான் திருவேங்கட மென்னும்

எம்பெருமான் பொன் மலைமேல் ஏதேனுமாவேனே. (10)

மேலுகங்களை எல்லாம் ஒரு கொற்றக் கொடையின் கீழே அரசாண்டு ஊர்வசியினை அடையப் பெரினும் நான் அதனை விரும்ப மாட்டேன். சிவந்த பவளம் போன்ற வாயையை உடைய திருவேங்கடம் என்னும் அழகிய பெயரை உடைய திருமலையின் மேல் ஏதேனு ஒரு பொருளாகப் பிறக்கக் கடவேன்.

687. மன்னிய தண்சாரல் வட வேங்கடத்தான்தன்

பொன்னியலும் சேவடிகள் காண்பான் புரிந்திறைஞ்சி

கொன்ன விலுங் கூர்வேல் குலசேகரன் சொன்ன

பன்னிய நூல் தமிழ் வல்லார் பங்காய பக்தர்களே. (11)

பகைவர்களைக் கொல்லும் தொழிலைப் பயின்ற கூர்மையான வேலாயுதத்தை உடைய குலசேகர ஆழ்வார், நிலை பெற்ற குளிர்ந்த வடவேங்கட மலையில் எழுந்தருளியிருக்கும் பெருமானது பொன் போன்ற சிவந்த திருவடிகளைக் கண்டு வணங்க ஆசைப்பட்டுத் தொழுது அருளிய தமிழ்ப் பாடலைக் கற்று அப்பெருமானின் திரு உள்ளத்திற்கு இனிய பக்தர்களாவர்.

நான் விரும்பிப் படித்தவைகள் பகுதி (07)

2010-04-21T23:42:00.000-07:00

திருமங்கை ஆழ்வார் அருளிச் செய்த

திருக்குறுந்தாண்டகம்

நிதியினை பவளத் தூணை நெறியமையால் நினையவல்லார்
கதியினைக் கஞ்சன்மாளக் கண்டுமுன்அண்டமாளும்
மதியினை மாலை வாழ்த்தி வணங்கி என்மனத்து வந்த
விதியினைக் கண்டு கொண்ட தொண்டனேன் விடுகிலேனே. (01)

காற்றினைப் புனலைத் தீயைக் கடிமதிளில்ங்கை செற்ற
ஏற்றினை இமயம்மேய எழில் மணித்திரளை இன்ப
வாற்றினை அமுதந்தன்னை அவுணனாரு யிரையுண்ட
கூற்றினை குணங் கொண்டு உள்ளம்! கூறு நீ கூறுமாறே. (02)

நான் விரும்பி படித்தவைகள் - பகுதி - (06)

2010-04-19T05:06:00.000-07:00

சொல்லாம லேபெரியர் சொல்லிச் சிறியர் செய்வர்

சொல்லியுஞ் செய்யார் கயவரே - நல்ல

குலாமாலை வேற்கண்னாய் கூறுவமை நாடிற்

பலா மாவைப் பாதிரியைப் பார்

நற்செயல்களைச் பெரியோர் ஒருவரும் சொல்லாமலே செய்து முடிப்பார்கள். இது பூப்பது தெரியாமலே கனியினை கொடுக்கும் பலாவைப் போன்றவர் இத்தகையையவர். மா பூத்துப் பின் கனியினைப் பின் தரும். இது போன்று ஒருவர் கூறியபின் நற்செயல்களைச் செய்வர்.பூப்பூக்கும் பாதிரி. ஆனால் கனி தராது. அது போன்று ஒருவர் நற்பண்புகள் பெற்றவர் போன்று தோன்றினாலும் அவர்களால் எத்தகைய பயானும் ஏற்படுத்தாது.

நான் விரும்பி படித்தவைகள் - பகுதி - (05)

2010-04-01T07:22:00.000-07:00

திருக்குறள் - அறத்துப்பால்

இல்லறம் - (7)மக்கட்பேறு

எழுபிறப்பும் தீயவை தீண்டா பழிபிறங்காப்

பண்புடை மக்கட் பெறின்

பிறர் பழிப்பதற்கு இடமில்லாத நல்ல பண்புடைய மக்களைப் பெற்றால் ஒருவனுக்கு எழுவகைப் பிறப்புகளிலும் தீவினைப் பயனாகிய துன்பங்கள் சென்றனுகாது.

நான் விரும்பி படித்தவைகள் - பகுதி - (04)

2010-03-27T01:05:00.000-07:00

திருக்குறள் - அறத்துப்பால் - கடவுள் வாழ்த்து

மலர்மிசை ஏகினான் மானடி சேர்ந்தார்

நிலமிசை நீடுவாழ் வார். (3)

அடியவரின்நெஞ்சமாகிய இதயத் தாமரையின் மேல் அமர்ந்திருக்கும் இறைவனின் மேலான், சிறந்த திருவடிகளை இடைவிடாமல் நினைக்கின்றவர்களே இன்ப உலகில் நிலையாக வாழ்வார்கள்.

வேண்டுதல் வேண்டாமை இலானடி சேர்ந்தார்க்கு

யாண்டும் இடும்பை இல. (4)

தனக்கு இவர் வேண்டியவர், இவர் வேண்டாதவர் என்ற தன்மையையுடைய

இறைவனின் திருவடிகளை அடந்தவர்க்கு எப்பொழுதும், எவ்விடத்தும்

துன்பம் இல்லை.

திருவாசகம் - திருச்சதகம் - மெய்யுண்ர்தல்

கொள்ளேன் புரந்தரன் மாலயன்

வாழ்வு குடிகெடினும்

நள்ளேன் நினதடி யாரொடல்

லால்நர கம்புகினும்

எள்ளேன் திருவரு ளாலே

இருக்கப் பெறினிறைவா

உள்ளேன் பிறதெய்வம் உன்னையல்

லாதெங்கள் உத்தமனே.

எங்கள் மேலானவனே! எங்கள் தலைவனே! உன்னுடைய திருவருளால் அடியேன் இருக்கப்பெறுவேனாயின், இந்த்ரன், திருமால், பிரமன் போன்றோருடைய பதவிகளை ஒரு பெரிய பதவிகளா க என்னுள்ளத்தில் கொள்ளமாட்டேன். என்னுடைய குடியானது முற்றிலும் அழிந்தாலும், உன்னுடைய அடியாரோடு அல்லாமல் பிறர் எவரொடும் தொடர்பு வைக்கமாட்டேன். நரகமே சென்றாலும் அந்நிலையை இகழ்ந்து நகையாடேன். உன்னைத்தவிர வேறு தெய்வங்களை மனத்தினாலும் நினைக்கமாட்டேன்.

நாலாயிர திவ்வியப் பிரபந்தம்

தொண்டரடிப் பொடியாழ்வார்

பச்சைமாமலை போல் மேனிப் பவளவாய்க் கமலச்

செங்கண்

அச்சுதா! அமரேறே! ஆயர்தம் கொழுந்தே என்னும்

இச்சுவை தவிர யான்போய் இந்திர லோகமாளும்

அச்சுவை பெறினும் வேண்ட்டேன் அரங்க

மாநகருளானே!

அடியார்களுக்காக திருவரங்கத்தில் என்றும் வசிப்பவனே! பசுமையான மலையைப் போன்ற திருமேனியினையும், பவளம் போல் சிவந்த வாயினையும், செந்தாமரை மலரைப் போன்ற கண்களையும் உடையவனே! அடியவரை ஒருநாளும் கைவிடாதவனே! தேவர்களுக்கு எல்லாம் சிறந்த தலைவனே! ஆய்ப்பாடியில் உள்ள ஆயர்களுக்கு எல்லாம் தலைவனே! என்றெல்லாம் உன்திருப் பெயர்களை சொல்லுதலால் உண்டாகும் ஆனந்தத்தை விட்டுவிட்டு, எங்கோ உள்ள தேவருலகத்தை ஆளும் படியான அச்செல்வத்தை பெறுவதான வாய்ப்பு கிடைக்கப் பெற்றாலும் அதனை நான் விரும்ப மாட்டேன். உன்னுடைய அடியார்களைப் போல் உன்னுடய திவ்விய நாமங்களைச் சொல்லவே நான் விரும்புவேன்.

மகாகவி பாரதியார் - வேண்டுவன

எனக்கு வேண்டும் வரங்களை

யிசைப்பேன் கேளாய் கணபதி,

மனதிற் சலன மில்லாமல்,

மதியி லிருளே தோன்றாமல்,

நினைக்கும் பொழுது நின்மவுன

நிலைவந் திடநீ செயல்வேண்டும்,

கனக்குஞ் செல்வம் நூறுவய

திவையுந் தரநீ கடவாயே.

அகவல்

கடமை யாவன தன்னைக் கட்டுதல்,

பிறர்துயர் தீர்த்தல், பிறர்நலம் வேண்டுதல்,

விநாயக தேவனாய், வேலுடைக் குமரனாய்,

நாரா யணனாய், நதிச்சடை முடியனாய்,

பிற நாட் டிருப்போர் பெயர்பல கூறி,

அல்லா யெஹோவா எனத்தொழு தின்புறும்

தேவருந் தானாய் , திருமகள், பாரதி,

உமையெனுந் தேவிய ருகந்தவான் பொருளாய்,

உலகெலாங் காக்கு மொருவனைப்போற்றுதல் -

இந்நான் கேயிப் பூமியி லெவர்க்கும்

கடமை யெனப்படும்; பயனிதில் நான்காம்,

அறம், பொருள், இன்பம், வீடெனு முறையே

தன்னை யாளுஞ் சமர்த்தெனக் கருள்வாய்,

மணக்குள விநாயகா, வான்மறைத் தலைவா,

தனைத்தா னாளுந் தன்மைநான் பெற்றிடில்,

எல்லாப் பயன்களுந் தாமே யெய்தும்;

அசையா நெஞ்ச மருள்வாய்;உயிரெலாம்

இன்புற் றிருக்க வேண்டிநின் னிருதாள்

பணிவதே தொழிலெனக் கொண்டு

கணபதி தேவா, வாழ்வேன் களித்தே.

பாரதிதாசன் கவிதை - சிரித்தமுல்லை

மாலைப் போதில் சோலையின் பக்கம்

சென்றேன்.குளிர்ந்த தென்றல் வந்தது.

வந்த தென்றலில் வாசம் கமழ்ந்தது.

வாசம் வந்த வசத்தில் டிரும்பினேன்.

சோலை நடுவில் சொக்குப் பச்சைப்

பட்டுடை பூண்டு படர்ந்து கிடந்து

குலுக்கென்று சிரித்த முல்லை

மலர்க்கொடி கண்டேன் மகிழ்ச்சிகொண் டேனே!

நான் விரும்பி படித்தவை - (3)

2010-03-20T05:36:00.000-07:00

(01) திருக்குறள் - அறத்துப்பால் - கடவுள் வாழ்த்து

கற்றதனா லாய பயனென்கொல் வாலறிவன்
நற்றாள் தொழாஅர் எனின். - - - - (௨)

தூய்மையான், களங்கமற்ற அறிவு வடிவமான இறைவனின் திருவடிகளை வணங்காதவர்க்கு அவர் கற்ற கல்வியினால் உண்டாகும் பயன் ஒன்றுமில்லை.
அறிவே தெய்வம். கற்ற கல்வியின் பயன் இறைவனின் திருப்பதங்களைத் தொழுதலேயாம்.
எனவே இறைவனின் திருவடிகளைப் பரவுவோம். கற்ற கல்வியின் பயனைப் பெறுவோமாக.

(2) திருவாசகம் - திருச்சதகம் - மெய்யுணர்தல்

[1] மெய்தான் அரும்பி விதிர்விதிர்த்
   துன்விரை யார்கழற்கென்
   கைதான் தலைவைத்துக் கண்ணீர்
   ததும்பி வெதும்பியுள்ளம்
   பொய்தான் தவித்துன்னைப் போற்றி
   சயசய போற்றியென்னும்
   கைதான் நெகிழ விடேன்உடை
   யாயென்னைக் கண்டுகொள்ளே.
என்னை ஆட்கொண்ட பெருமானே! உன்னுடைய மணம் நிறை திருவடிகளைப் பெறுவதற்கு, என்னுடல் சிலிர்த்து, நடுநடுங்கிக் கைகளைத் தலையின்மேல் வைத்துக் கண்ணீர் மிகுத்து, உள்ளம் மிகவருந்தி, பொய்மையை விலக்கி, மெய்மையாகிய உன்னை நினைத்து, போற்றி சயசய போற்றி என வழிபடும் முறையை என்னிடமிருந்து தளர விடமாட்டேன்.எனவே, என்னை நீ கவனித்து,
உன் அன்பருள் ஒருவனாக ஏற்றுக் கொள்வாயாக.

(3) நாலாயிரத் திவ்வியப் பிரபந்தம்
தொண்டரடிப் பொடியாழ்வார்
திருமாலை - [(1) 842]
காவலில் புலனை வைத்துக் கலிதன்னைக்
   கடகப் பாய்ந்து
நாவலிட்டு உழிதருகின்றோம் நமன்தமர்
   தலைமகள்மீதே
மூவுல குண்டுமிழ்ந்த முதல்வ ! நின்நாமம் கற்ற
ஆவலிப் புடைமை கண்டாய் அரங்கமா
   நகருளானே.

எல்லா உலகங்களையும் பிரளய காலத்திலே வயிற்றில் வைத்து பாதுகாத்துப் பின்னர் வெளிப்படுத்திய உலகுக்கு காரணமான முதல்வனே! உன்னுடைய திருநாமத்தைக் கற்றதனால் உண்டான, கர்வத்தினாலே, ஐம்புலன்களையும் கவலின்றி கண்டபடி திரியவிட்டு, அப்படியிருந்தும் பலபாவங்களையும் உதறித் தள்ளி, வெற்றிக் கூச்சலிட்டு, யமன், அவனின் தூதர்கள் ஆகியோர்களின் தலைகளின் மேலே அடியிட்டு திரிகின்றோம். அறிவாயாக.
இறைவனின் திருநாம பலத்தாலே புலன்களைத் தகாத விஷயங்களில் செல்லாதபடி அடக்கி ஆளமுடியும். இறைவனைக் காட்டிலும் ஆயிரம் மடங்கு பாதுகப்பானது அவனது திருநாமம் என்பது கருத்தாகும்.

(4) மகாகவி பாரதியார்
விநாயகர் நான்மணிமாலை

கற்பக விநாயகக் கடவுளே, போற்றி;
சிற்பர மோனத் தேவன் வாழ்க,
வாரண முகத்தான் மலர்த்தாள் வெல்க,
ஆரண முகத்தான் அருட்பதம் வெல்க,
படைப்புக் கிறையவன் பண்ணவர் நாயகன்
இந்திர குருஎன த்தயத் தொளிர்வான்
சந்திர மவுலித் தலைவன் மந்தன்
கணபதி தாளைக் கருத்திடை வைப்போம்;
குணமதிற் பலவாம்; கூறக் கேளீர்;
உட்செவி திறக்கும்; அகக்கண் ஒளிதரும்;
அக்கினி தோன்றும்; ஆன்மை வலியுறும்;
திக்கெல்லாம் வென்று ஜயக்கொடி நாட்டலாம்;
கட்செவி தன்னைக் கையிலே யெடுக்கலாம்;
விடத்தையும் நோவையும் வெம்பகை யதனையும்
துச்சமென் றெண்ணித் துயரிலா திங்கு
நிச்சலும் வாழ்ந்து நிலைபெற் றோங்கலாம்;
அச்சந் தீரும்; அமுதம் விளையும்;
வித்தை வளரும்; வேள்வி யோங்கும்;
அமரத் தன்மையு மெய்தவும்
இங்குநாம் பெறலாம்; இஃதுணர் வீரே.

(5) பாரதிதாசன்

எங்கெங்குக் காணினும் சக்தியடா, - தம்பி
ஏழுகடல் அவள் வண்ணமடா! - அங்குத்
தங்கும் வெளியினிற் கோடியண்டம் - அந்தத்
தாயின் கைப்பந்தென ஓடுமடா! - ஒரு
கங்குலில் ஏழு முகிலினமும் - வந்து
கர்ச்சனை செய்வது கண்டதுண்டோ? - எனில்
மங்கை நகைத்த ஒலியெனலாம் - அவள்
மந்த நகையங்கு மின்னுதடா!

காளை ஒருவன் கவிச்சுவையைக் - கரை
காண நிணைத்த முழுநினைப்பில் - அன்னை
தோளசைத்தங்கு நடம்புரிவாள் - அவன்
தொல்கறிவாளர் திறம் பெறுவான் - ஒரு
வாளைச் சுழற்றும் விசையினிலெ - இந்த
வையம்முழுவதும் துண்டு செய்வேன் - என
நீள இடையின்றி நீ நினைத்தால் - அம்மை
நேர்படுவாள் உன்றன் தோளிலே!

நான் விரும்பி படித்தவை - (2)

2010-03-09T18:07:00.000-08:00

சிவசக்தியிடம் கேட்பன

நல்லதோர் வீணை செய்தே - அதை

நலங்கெடப் புழுதியில் எறிவது உண்டோ?

சொல்லடி, சிவசக்தி ! - எனைச்

சுடர்மிகும் அறிவுடன் படைத்து விட்டாய்.

வல்லமை தாராயோ - இந்த

மாநிலம் பயனுற வாழ்வதற்கே?

சொல்லடி சிவசக்தி! - நிலச்

சுமையென வாழ்ந்திடப் புரிகுவையோ?

விசையுறு பந்தினைப்போல் - உள்ளம்

வேண்டிய படிச்செலும் உடல்கேட்டேன்,

நசையறு மனங்கேட்டேன் - நித்தம்

நவமெனச் சுடர்தரும் உயிர்கேட்டேன்,

தசையினைத் தீசுடினும் - சிவ

சக்தியைப் பாடுநல் அகங்கேட்டேன்,

அசைவறு மதிகேட்டேன்; - இவை

அருள்வதில் உனக்கெதுந் தடையுளதோ?

- மகாகவி பாரதியார்

தினம் ஒரு குறள் - அறத்துப்பால்

2010-03-09T17:46:00.000-08:00

கடவுள் வாழ்த்து

அகர முதல எழுத்தெல்லாம் ஆதி

பகவன் முதற்றே உலகு

எழுத்துகள் எல்லாம் அகர ஒலியினை முதலாக உடையன. அது போல் உலகமானது - உலகின் உயிர்கள் எல்லாம் - முழு முதற் கடவுளை, எல்லாம் வல்ல முழுமுதல் இறைவனை முதலாக கொண்டவையாம்.

இலக்கிய இன்பம் - பகுதி -01

2010-02-17T23:48:00.000-08:00

அனுமன் துதி

அஞ்சிலே ஒன்று பெற்றான்

அஞ்சிலே ஒன்றைத் தாவி

அஞ்சிலே ஒன்று ஆறாக

ஆரியர்க் காக ஏகி

அஞ்சிலே ஒன்று பெற்ற

அணங்கைக்கண்டு அயலார் ஊரில்

அஞ்சிலே ஒன்றை வைத்தான்

அவன்நம்மை அளித்துக் காப்பான்.

இப்பாடலை ஒருமுறை வாய்விட்டுப் படியுங்கள்.ஏனெனில் அப்படி படிப்பதன் மூலம் பாடலின் ஓசை நயத்தினையும், சொல்லாட்சியினையும் நம்மால் நன்கு உணர இயலும். படித்து விட்டீர் களா? ஏதேனும் புரிகிறதா? ஐந்து என்ற எண்ணை வைத்து புலவன் சொல்லாட்சி செய்துள்ளார்.

      இலங்கையில் இராவணனால் சிறை வைக்கப் பட்டிருந்த சீதையை, சொல்லின் செல்வன் என்றழைக்கப்படும் அனுமன் கடலைத் தாண்டி இலங்கைக்குச் சென்று சீதையைக் கண்டு, பின் இலங்கையைத் தீக்கிரையக்கிய செயலைத் தான் இப்பாடல் விளக்குகிறது.

   இவ்வுலகம் ஐம்பெரு மூலங்களால் ஆகியது. நிலம், நீர், நெருப்பு, காற்று, ஆகாயம் என்பவையே அவை. பஞ்ச பூதங்களெனவும் இவை அழைக்கப் படுகின்றன.இந்த ஐம்பூதங்களே இங்கு ஐந்து எனக் குறிக்கப் படுகிறது.

   பதப்பொருள்: அஞ்சிலே ஒன்று பெற்றான் - பஞ்ச பூதங்களில் ஒன்றான
   வாயுபகவான் (காற்று) பெற்ற மகனான அனுமன்.,
   அஞ்சிலே ஒன்றைத் தாவி - பஞ்ச பூதங்களிலே மற்றொரு
பூதமாகிய நீராலான கடலைத் தாண்டி,
                                    அஞ்சிலே ஒன்று ஆறு ஆக - பஞ்ச பூதங்களிலே மற்றொரு
                                    பூதமாகிய ஆகாயம் வழியாக,
   ஆரியர்க்காக ஏகி - மேலோனாகிய இராமனுக்காகச் சென்று,
                                   அஞ்சிலே ஒன்று பெற்ற அணங்கைக் கண்டு - பஞ்ச பூதங்க-
                                   ளிலொன்றான பூமியாகிய நிலத்தில் பிறந்த பெண்ணைக்
   (சீதையைக்) கண்டு ,
அயலார் ஊரில் - பகைவர்களின் ஊரில் (இலங்கையில்)
                    அஞ்சிலே ஒன்றை வைத்தான் - பஞ்ச பூதங்களில் மிச்சமுள்ள
நெருப்பை வைத்தான்,
   அவன் நம்மை அளித்துக் காப்பான் - அந்த அனுமன் நம்மைப்
                                   பாதுகாத்து அருளுவான்.

முதலில் படிக்கும்போது கொஞ்சம் கூட புரியாமலிருந்த இப்பாடல், இப்போது
வெகு எளிதாய்ப் புரிகிறதல்லவா? அப்பாட்டில் பொருளை மறைத்து வைத்து , அதைத்தேடி நாம் அனுபவிக்கும் படியாக புலவர் செய்ததி ஓர் இலக்கிய இன்பம்
தோன்றுகிறதல்லவா?

இப்பாடலைப் போன்றே காணி [ 1/80] என்ற தமிழ்க் கணக்கெண்ணை வைத்து
ஒரு புலவன் செய்துள்ள நயத்திக் காண்போமா.

காணியுங் காணியுங் காணியுங் காணியுங் காணியுங்காற்
காணியுங் காணியுங் காணியுங் காணியுங் காணியமுக்காற்
காணியுங் காணியுங் காணியுங் காணியுங் காணியு நாற்
காணியுங் காணியுங் காணியுங் காட்டுங் கழுக்குன்றமே.

       இப் பாடலைப் வாய்விட்டுப் படியுங்கள். ஏதேனும் பொருள் விளங்குகிறதா?

               இப் பாடலில் காணி என 18 முறை வருகிறது.
   இதனுடன் கால், முக்கால், நாற்கால் என வருகிறது. [ 1/4 +3/4+ (4x1/4) ]= 2
   18 காணி + 2 காணி = 20 காணி வருகிறது. ஆகவே 20x1/80= 1/4 (கால்).

ஈசனின் திருவடியைக் (காலைக்) காண வேண்டுமானால் திருக்கழுக்குன்றம் வாருங்கள் என புலவ்ர் பெரு மகனார் நமை அழைக்கிறார்.

இறைவனுடைய திருப் பாதங்களை திருப்பெருந்துறையில் பெற்ற மாணிக்கவாசகர்

அத் திருப் பாதங்களை திருக்கழுக்குன்றத்தில் வைத்து காணொனாத திருக்கோலம் கண்டு மகிழ்ந்தார்.

நான் விரும்பி படித்தவைகள் - பகுதி - 01

2010-01-01T23:45:00.000-08:00

மனதில் உறுதி வேண்டும்

மனதி லுறுதி வேண்டும்

வாக்கினி லேயினிமை வேண்டும்

நினைவு நல்லது வேண்டும்

நெருங்கின பொருள் கைப்பட வேண்டும்

கனவு மெய்ப்பட வேண்டும்

கைவசமானது விரைவில் வேண்டும்

தனமும் இன்பமும் வேண்டும்

தரணியிலே பெருமை வேண்டும்

கண் திறந்திட வேண்டும்

காரியத்தி லுறுதி வேண்டும்

பெண் விடுதலை வேண்டும்

பெரிய கடவுள் காக்க வேண்டும்

மண் பயனுற வேண்டும்

வானமிங்கு தென்பட வேண்டும்

உண்மை நின்றிட வேண்டும்

ஓம் ஓம் ஓம் ஓம் ஓம்

- மகாகவி பாரதியார்